Kpeŋgbene

Kpeŋgbene kɛna wonuu nakʊyʊ kɩmaɣnaa nɛ kɩwɛna hɔɔlɩŋ loɖo nɛ pohuyi paa hɔɔʊʊ ŋgʊ lɛ pɔŋ kʊɖʊm pɩsɩɩna loɖo ŋgʊ. Pɩkɛna aleɣya wonuu nakʊyʊ nɛ paaleeyuna-kʊ lɛ, paɖʊ-kʊ fuwa nakayɩ taa nɛ pecidi nɛ pohuti. Pɩlɩɣʊ hɔɔlʊʊ ŋgʊ lɛ, kɩ-tɛ akɔntaa ŋlakɩ. Pasakɩ kpeŋgbena nɛ wondu ndɩ ndɩ. Papɩzʊ pasaɣna kpoŋgbolo, mɔɔ hʊɖʊbanaa yaa wonuu nakʊyʊ yem. Kpeŋgbene nɖɩ ɖɩ-hɔɔlɩŋ ɩnʊ ɩtɩŋga ɩwɛ kɩmaŋ nɛ paa hɔɔlʊʊ ŋgʊ lɛ, kɩ-walanzɩ taa maɣna ɛzɩ santimɛtanaa kʊɖʊm nɛ naalɛ pɛhɛkʊ taa. Paa hɔɔlʊʊ ŋgʊ lɛ nɛ kʊ-ñʊʊ. Pɩkpaɣna kʊɖʊmʊ pɩkɔɔ pɩsɩɩna loɖo. Paɖʊ ñʊŋ ɩnʊʊ ɛzɩma yɔ, pɛkpɛnda ɩ-hɔɔlɩŋ nɩɩlɛ weyi ɩha-ɖama nɛ siɣye, pɩkpɛndʊ pɩlɩɩ lʊbɛ. Pɩtasɩ ɖɔɖɔ lɛ, ñʊʊ kacalaɣ ñɩŋgʊ, naalɛ nɛ naatozo ñɩŋgʊ kpɛnda ɖoli kʊɖʊm kɛ kolaɣ ŋga kɛwɛ cʊlʊ cʊlʊ yɔ.

Ñʊŋ ɩnʊ ɩ-taʊ yaa ihuyu takɩlɩ kaɖɛ. Ɛyʊ ɛcaɣ-ɩ taʊ lɛ, ɛta-ɩ ɛzɩ waacɩ ɛcɔʊ ɖɔŋgʊ yɔ. Kpeŋgbene tɔm kaawɛ ɖooo caanaʊ taa nɛ tɛtɛ kpɩna mɔɔ pasakaɣ. Pɩwɛ kaɖɛ se pɛkɛdɩ camɩyɛ kpeŋgbene ɖɩlɩyɛ yaa alɩwaatʊ ndʊ tɩ-taa kɩlɩwa nɛ mɔɔ wena palakaɣna yɔ. Takayɩsɩ mayaa maa se kpeŋgbene kaawɛɛ pʊcɔ nɛ ɖeɖe tɔm kpɛlɛkʊʊ talɩʊ. Ñɩnɩya na kpeŋgbena nɩɩyɛ kɛ Ɛndusi ɛjɛŋ nɩɩyɛ taa nɛ pɩtalʊʊ pɩnzɩ ɛzɩ 4 300 yɔ nɛ ɩlɩna Azii tɛtʊ taa. Pɩtɛ alɩwaatʊ kɛ mbʊ yɔ, hɔɔlɩŋ weyi ɩha ɖama nɛ siwa yɔ, pɛkpɛnda-ɛ, pɩtɛkɛ itɩŋga ɩtalɩɣna lʊbɛ. Ɖooo lɛ, kpeŋgbena taakɛna aleeya wonuu ɖeke ɛlɛ pɩɩkɛna mbʊ pɔpɔzaɣna pee yɔ yaa patɩyaɣna yɔ. Pʊyɔɔ kɛ ɛyʊ sɩkɩ lɛ, pepiŋna-i nɛ kpeŋgbena naayɛ. Roma tɛtʊ taa kɛ kpeŋgbena aleɣya paza tɔyʊ Horace alɩwaatʊ taa.