Lɔŋ pasʊʊ (morale)

Wɛtʊ kɩbandʊ nʊmɔʊ tɩŋʊʊ payaɣna fransɩɩ kʊnʊŋ taa se mooraalɩ. Pɩkɛ lɔŋ pasʊʊ nabʊyʊ. Palʊlʊʊ pɩɣa lɛ, pʊwɛɛ se pɛkpɛlɛkɩ-kɛ wezuu caɣʊ kɩbam. Pʊwɛɛ se pɛkpɛlɛkɩ-kɛ ñamtʊ haʊ, ɖɔnɛ kɩbanɖɛ. Tʊmɩyɛ labʊ nɛ taa leleŋ.

Ɖɩɣa taa lɛ, pʊwɛɛ se pɛkpɛlɛkɩ-kɛ ka-ñɩma sɛʊ paa tanaŋ ŋgʊ. Pʊwɛɛ se kalɩɣna kuduyuu tɛɛ lɛ, kɔkɔ kɛ-ɛsɩndaa. Kɔkɔʊ kɛ-ɛsɩndaa nɛ pɩtɛ lɛ, kowolo kɛsɛɛ ka-caa nɛ ko-ɖoo. Kɛsɛɣ-wɛ pɩtɛ lɛ, kɛsɛɛ ɖɔɖɔ ka-ɖalaa nɛ kɔ-kɔɔnaa.

Sɛtʊ wayɩ lɛ, kala ka-tʊma cikpene wena paɖʊ-kɛ se kala yɔ.

Yee mbʊ mbʊ payaɣ se mooraalɩ yɔ yaa wɛtʊ kɩbandʊ yɔ, ɖɩɣa taa pɩpaɣzɩɣna nɛ pʊcɔ pɩlɩɩna awayɩ. Sukuli taa lɛ, pɛkpɛlɛkɩ pɩɣa ɛzɩma kaña ka-wɩlɩyaa nɛ ka-kɩkpaɖaa yɔ. Pɛkpɛlɛkɩɣ pɩɣa ɖɔɖɔ sukuli taa habɩyɛ yɔɔ paɣtʊ ndɩ ndɩ ndʊ pʊwɛɛ se ɛyʊ ɛña nɛ kɛkpɛdɛzaɣ nakɛyɛ ɛtaala habɩyɛ yɔɔ yɔ.

Yee pɩɣa nakɛyɛ ɛɖɔŋ habɩyɛ yɔɔ nɛ kaañaŋ habɩyɛ yɔɔ ɖɔnɛ paɣtʊ yɔ, pɔtɔŋ se pɩɣa ŋga kotowolo sukuli. Kɛkɛ kɩmɛlɛŋ. Patʊ pɩɣa nakɛyɛ mbʊʊ yɔ, pɩwɩzɩɣ ka-ñɩma siŋŋ. Ɖɔɖɔ lɛ, pɩɣa nakɛyɛ ɛwɛɛ nɛ kaasɩŋ sɛtʊ yɔ, pɔtɔŋ-kɛ se ka-ñɩma tɛkpɛlɛkɩ-kɛ wɛtʊ kɩbandʊ.

Wɛtʊ kɩbandʊ ndɩ ndɩ lɩɣna mooraalɩ cɔlɔ. Ɛlɛ, ɛyʊ fɩtɩyɩm taa wɛtʊ ndɩ ndɩ kɩbandʊ tɩŋa hosi ñɔʊ. Fɩtɩyɩm taa maɣzɩm kɩbam tɩŋa lɩɣna.