Pee ɛwaɣ

Pee ɛwaɣ kɛna pɩyɛ naɖɩyɛ nɛ ɖɩlɩɣna pʊŋ weyi ɩ-taa miŋ lɩʊ fɩŋŋŋ fɩŋŋŋ yɔ. Miŋ ɛnʊ, ɖooo kiɖe tɛɛ lɛ, pɩɩkɛna pɔdɔʊ yaa mɩnandʊ natʊyʊ nɛ tɩwɛ kɔɖɩɩɩ kɛ pʊʊŋ ɩnʊ i-putuuɖe taa yaa ɩ-tɛtɛɛ. Alɩwaatʊ ndʊ soŋgaɣ kpaɣ kpɩnandʊ ndʊ camɩyɛ lɛ, tiyoluu nɛ tɩmʊ miŋ nɛ tɩyɔkɩ pʊʊ kɛ pɔʊ nɛ miŋ lɩɩ ɛzɩ miŋ nzʊlʊma yɔ. Pɔdɔʊ ŋgʊ kɩkɔŋ nɛ kɩhɛɛ lɛ, kɩkpa ɖoŋ kaŋ kaŋ nɛ pɩpɩsɩ kaaŋ ɖɔŋ ñɩŋ weyi payaɣ-ɩ se pee ɛwaɣ yɔ. Kaaŋ ɩnʊ ɩwɛ ɖoŋ nɛ ɩ-yɔɔ wɛɛ cɔkʊ cɔkʊ nɛ pɔŋ nɩɩyɛ wɛɛ ɖɔɖɔ ɩ-yɔɔ. Tɛtʊ lɩzʊʊ kpɛlɛkɩya, tɛtʊ maʊ tʊʊzʊʊ kpɛlɛkɩya nɛ tɛtʊ tʊʊzʊʊ wɛɖʊʊ ñɩnɩya tɔŋ se pee ɛwaɣ taa nɛ ñɩɣlɩm pɛɛ naayɛ nɛ a-taa kɔyɔ: kʊwasi, fɛlɩdɩspati nɛ mika. Tɛtʊ yɔɔ payɩ lɛ, pee ɛwaɣ anɛ nɛ kaaŋ lɛɛŋ ndɩ ndɩ kɩlɩna wɛʊ tɛtʊ pɔɔɖɛ yɔɔ.

Pee ɛwaɣ kanɛ kɛkɛna kaaʊ ŋgʊ kɩwɛ ɖoŋ kaŋ kaŋ yɔ nɛ pɩtɛ kaaŋ kɛ palakɩna kondolokonaa, kuduyiŋ sɔsɔŋ kpɛndɛla nɛ ɩnʊ ɖɔɖɔ pɔyɔkʊʊ nɛ paɖʊʊ kotaalɩ kɛ habɛɛ yɔɔ. Pakpakʊɣ-ɩ ɖɔɖɔ nɛ polukina sɩʊkpelasi sɔsɔsɩ ndɩ ndɩ. Pɩtasɩ ɖɔɖɔ lɛ, kaaŋ ɩnʊ pataaɖʊ kuduyiŋ yɔɔ nɛ pɩwɛʊ ɖeu camɩyɛ. Keteŋga kpeekpe taa lɛ, Yozemiti lakʊ taa, Kalifɔɖɩnii ɛjaɖɛ taa kɛ pee kaaʊ kʊnɛ panaɣ-kʊ nɛ ŋgʊ kɩlɩna kʊyʊʊ. Keteŋga kpeekpe taa lɛ, Yozemiti lakʊ taa, Kalifɔɖɩnii ɛjaɖɛ taa kɛ pee kaaʊ kʊnɛ panaɣ-kʊ nɛ ŋgʊ kɩlɩna kʊyʊʊ. Ɛndɩ ɛjaɖɛ taa, sakaɣ nakayɩ wɛɛ nɛ pee kaaŋ ɩnɛ iɖeke petizina-kɛ. Sakaɣ ŋga ka-taa ɖɔɖɔ nɛ tilimiye sɔsɔyɛ naɖɩyɛ nɛ kaaʊ kʊnɛ kiɖeke koŋ kɛ pasaɣ-kɛ. Ɖɩwɛ peeɖe pɩnzɩ mɩnɩŋ naatozo taa pʊcɔ alɩwaatʊ tʊnɛ tɩtalɩ.