Sɩpaanaa tɔʊ kɛna samaɣ taa aleɣya naayɛ. Takayɩsɩ kɩkpɩndasɩ nasɩyɛ yɔɔ kɛ palɩzʊ aŋjaʊnaa nabɩyɩ yaa palɩzʊ nabʊyʊ yem ɛlɛ pɩwɛna pʊ-tɔbʊʊ. Paa takayaɣ kɩkpɩndaɣ ŋga lɛ, kɛwɛna ñʊʊ ŋgʊ pakɑlʊ-kʊ yɔ. Sɩpaanaa pɩzʊ pɛwɛɛ ɛzɩ 32 yɔ yaa 52 yɔ. pɛwɛ 54 kɔyɔ pʊ-tɔbʊʊ se naalɛ wɛ nɛ weyi ɛtɔʊ-wɛ yɔ, ɛzɩma naŋna kɩwakɩ yɔ. Paatɔʊ sɩpaanaa lɛ, pakalʊ ñʊŋ 12, 18, 24, 36, 48 yaa 72. Mba pɔtɔʊ yɔ, kacalaɣ taa lɛ, pɛwɛʊ naalɛ ɛlɛ pakalɩ ñʊŋ 12, naatozo yee pɩkɛ ñʊŋ 18 kɔyɔ, naanza kalʊ ñʊŋ 24, looɖo ñakalɩ ñʊŋ 36, litoozo kalʊ ñʊŋ 48 pʊwɛɛ mbʊ nɛ pɩɖɛʊ. Yee kʊɖʊm ɛtɔʊna kɔyɔ, ɛna weyi ɛɛnaɣ-ɩ yɔ pɔtɔʊna nɛ ɛyaɣ pʊŋdʊ se aŋjaʊ nɛ eemulu-i ɖɔɖɔ.

Paa takayaɣ kpengbene ŋga lɛ, pama kɔ-yɔ ñʊŋ pɩkpanaɣ kʊɖʊm pɩsɩɩna 10. Mba pakɩla ñʊʊ hiu yɔ, pama pɔ-yɔɔ J Q nɛ K. Tɔʊ taa lɛ K wakɩ Q nɛ mba patatalɩ Q yɔ. sɩpaanaa taa ɖɔɖɔ nɛ hazɩŋ nɛ ɩ-yɔɔ palɩza tɔɔyɩŋ yaa awiya. Sɩpanaa wɛna hɩla ndɩ ndɩ. Pa-taa kɔyɔ: yɛɛtɛ, sɩpaa, kulii nɛ keɖeu. Kɩkpɛdaa wɛ naalɛ: sɩpaa nɛ kulii piyele kɩsɛɛmaa naalɛ ɖɔɖɔ: keɖeu nɛ yɛɛtɛ. Sɩpaanaa nabayɩ wɛɛ lɛ, pama pɔ-yɔɔ pɩɖɛɛ hiu yɔɔ. Sɔsaa nɛ cikpema pɛwɛɛ. Cikpema paɣzʊna ñʊʊ kʊɖʊm pɩsɩɩna looɖo. Sɩpaanaa tɔʊ wɛɛ ndɩ ndɩ pɩlɩɩna tɔya sɔɔlɩm taa.

Pʊcɔ papaɣzɩ-wɛɛ tɔʊ lɛ, pofutuu-wɛ pʊtɔbʊʊ se pesidu-wɛ ɖama taa kpɛlɩkpɛlɩ. Weyi efutuu yɔ ɛnʊʊ payaɣ tɛyɩyʊ. Weyi ɛwakɩ lɛɛlʊ yaa lala yɔ, ɛnʊ futuuna. Weyi paɖaɣ ɖʊʊ yɔ, ɛpɩzʊ ɛcɛpɩ-wɛ. Cɛbʊ kɛlɛ se ecozuu nabayɩ nɛ pʊyɔɔ nɛ ɛsɩɩ-wɛ nɛ pɩtɛɛ kiŋ. Mbʊ pʊyɔɔ yɔ, futuyu pɩzʊ emuli nɛ ɛsɩɩ sɔsa nɛ pɩtɛɛ se ɛmɩlɩ-wɛ. Lakasɩ nzɩ kɛ payaɣ se akpama. Nɛ nɔɔyʊ ɛlaba akpama nɛ pakpa-ɩ kɔyɔ, paapɩzʊ pɛkpɛ-ɩ ñʊŋ cabɩ. Papɩzʊ pɔtɔ sɩpaanaa nɛ liidiye yaa pakalɩ ñʊŋ yem. Hɔɔlʊʊ ŋgʊ kɩ-taa mba wakɩ yɔ, pakpakʊ liidiye nɖɩ yaa paɖʊ kpaɣɖɛ.