Wendu kɛna tɔm kususutu ndʊ posusuu ɛlɛ paakpaɣ nɔɔyʊ nɛ ɖoŋ se ewelesi yaa ɛɖɔ tɩ-yɔɔ yɔ. Wendu teu nɛ tɔm yem yɔɔdʊ yaa susuu wɛ ndɩ. Wendu teu taa tɔm wɛ leleŋ welesuu taa. Weŋgaliyu cʊnʊʊ ɛ-wendu nɛ tɩwɛɛ leleŋ kɔŋŋgɔ nɛ tɔm pe wena alɩʊ nɛ ɛ-nɔɔtaa yɔ, atɩŋgʊ ɖama ɛzɩ nandʊ nʊm kpeŋgʊʊ tɩ-ɖaʊ yɔɔ yɔ. Wendu teu ɛɛpɔzʊʊ paa ɛsɩmtaa se pocuuzi cɩmʊi nakʊyʊ pʊcɔ pɩwɛɛ leleŋ.

Ɖooo lɔndaa, haɖaa, ninɖiyaa, halaa, agbama, kpagbasɩ kpayaa, cʊŋ mayaa yaa yoŋ laɖaa tewaɣ wendu ndɩ ndɩ pɩlɩɩna pa-tʊma yɔɔ nɛ pɛɖɛyʊʊ ɖama yaa pa-tɩ. Po-wendu teu taa kɛ mbʊ yɔ, patamakɩ cɩmɩŋ. Papɩzʊ petee wendu kɛ kacʊcʊlaɣ taa, lɩʊ tɛɛ yaa nɔɔ taa ɖoŋ. Ɛlɛ alɩwaatʊ ndʊ tɩ-taa cɩmɩŋ paɣzɩ lɩʊ yɔ, peteu wendu nɛ pesidi-cɩmʊ, tɩtasʊ wɛʊ leleŋ kɔŋgɔ. Cɩmɩŋ wondu ndɩ ndɩ taa peteu wendu.

Paa hɩsɩ taa, nɔndɔŋ taa, aŋganda taa, catɩyasɩ taa, kpandɩkolokolowaa taa, piyano taa, aɖakaɣ cɩmʊʊ taa, kɛŋgɛnaa taa, kamɩŋ maɣmaɣ taa yaa paa cɩmʊ wonuu ŋgʊ kɩ-taa, ɛyʊ ɛsɔɔlaa eteu wendu. Paa wendu ndʊ, tɩnɛ tɩ-tɔbʊʊ. Weŋgalɩyaa pɩzʊ petee nɔɔyʊ yɔɔ tɔm kpeekpe yaa pa-maɣmaɣ pɔ-yɔɔ tɔm kɛ wendu taa. Papɩzʊ petee wendu patʊʊ nɔɔyʊ yaa pasamɩ-ɩ. Ɛpɩzʊʊ ɛnɩɩ pʊ-tɔbʊʊ yaa ɛɛnɩʊ ɛlɛ ɛpɩzʊʊ ɛwɛɛ payɛ yɔɔ.

Wendu wɛna pɩlɩŋ ndɩ ndɩ: ɛsɔ samtʊ wendu wɛna tɩ-ndɩ nɛ agɔlɔma taa ñɩndʊ ɛzɩ habɩyɛ wendu nɛ tɩ-soo pɛwɛʊna ndɩ nɛ kamɩŋ wendu nɛ tɩ-kamʊʊ yɔ. Ɖɔɖɔ ɛzɩ sɔnzɩ wendu nɛ tɩ-soo pɛwɛʊna ndɩ nɛ kasandʊ natʊyʊ yem yɔ. Wendu lɩzʊʊ pɩzʊ pɩpɔzɩ ɛyaa ɛzɩ naalɛ yɔ: tɔm lɩzɩyʊ nɛ ti-wendu luɖu. Lɛlʊ pɩzʊ ɛpaɣzɩ pɩcɔ naalɛ-tʊ tɩŋ ɛwayɩ. Cimʊʊ luɖu pɩzʊʊ elu pɩcɔ nɛ tɔm pe-tʊ lɩzɩ ɛ-tɔm yaa palɩzɩ tɔm pɩcɔ palɩzɩ cɩmʊʊ.